सिन्धुपाल्चोक–१ बाट राष्ट्रिय स्वतन्त्र पार्टी (रास्वपा) का उम्मेदवार भरत प्रसाद पराजुली २४ हजार ४१३ मतसहित प्रतिनिधि सभा सदस्यमा निर्वाचित भएका छन्। उनका निकटतम प्रतिस्पर्धी माधव सापकोटाले १७ हजार ३२७ मत प्राप्त गरेका छन्। करिब ७ हजार मतान्तरको जितले पराजुलीप्रति जनताको बलियो विश्वास देखिएको छ।
पराजुलीको पहिचान केवल राजनीतिज्ञको रूपमा होइन, एक सफल सामाजिक अभियन्ताको रूपमा स्थापित छ। २०५५ सालतिर मांखा क्षेत्रबाट सुरु गरिएको खानेपानी अभियानमार्फत उनले दर्जनौं गाउँमा धारा पुर्याउँदै स्थानीयको जीवन सहज बनाएका थिए। सात वर्षसम्म विभिन्न बस्तीमा खानेपानी, सरसफाइ र आयआर्जन कार्यक्रम सञ्चालन गर्दै उनले ग्रामीण विकासमा योगदान दिएका छन्।
ऊर्जा क्षेत्रमा पनि सक्रिय पराजुलीले सिन्धुपाल्चोकका जलविद्युत आयोजनामा नेतृत्व गर्दै स्थानीयलाई रोजगारी र लगानीको अवसर दिलाउने प्रयास गरेका छन्। अब भने उनी आर्थिक समृद्धिलाई मुख्य एजेन्डा बनाएर राजनीतिमा सक्रिय भएका छन्।
कृषि, पर्यटन, ऊर्जा र उद्योगलाई सँगै अघि बढाउँदै जिल्लाको समग्र विकास गर्ने उनको योजना छ। सामाजिक सेवाबाट सुरु भएको उनको यात्रा अब संसदमार्फत नीति निर्माणमा कति प्रभावकारी हुन्छ भन्नेमा सबैको चासो केन्द्रित भएको छ।
सम्बन्धित खवर
